Himpi gimpi gella

Þessi plata innihélt aðeins þetta eina lag og var framleidd  í  linu plasti , þannig að það þurfti að leggja hana ofan á aðra hljómplötu og tíkall ofan á miðjuna til að fergja hana. Platan var framleidd í Bandaríkjunum, fallega gul og var dreift með tímaritunum Samúel og Vikunni. 

Lagið var tekið  upp í Grjótnámunni 1990 og var upptökumaður Nick Cathcart-Jones.

Sigurður „Kollþrykktur“ Kristinsson var kallaður inn til að leika á rafgítar. Hann fékk enga æfingu, það var bara stungið í samband og sett á upptöku. Í laginu fer Einar á kostum með nýtt tæki sem hann hafði eignast, E-max, en það bauð upp á að taka upp eitthvert hljóð og leika síðan hljóðið á allar nótur hljómborðsins. Í þessu lagi söng Einar inn orðið „Ræ“ og er allur sólókaflinn leikinn með þessari tækni. 

Lagið er skrýtin og skemmtileg útsetning og staðfærsla á gamla Rolling Stones-slagaranum  Honky Tonk Woman.  Lagið var sett í valstakt og textinn heimfærður upp á íslenskan raunveruleika.  Til að hafa allt löglegt var haft samband við skrifstofur Rolling Stones í Bretlandi til að fá leyfi, en það var nú hreint ekki auðsótt. Einhverjir lögfræðingar kröfðust þess að fá löggilta skjalaþýðendur til að þýða íslensku þýðinguna yfir á ensku.  Þegar þeir heyrðu að það ætti að láta söguna gerast á skemmtistöðunum Brabra (sem var gæluheiti á stað sem hét Abracadabra) og Geirsbúð sögðu þeir þvert nei.  Þetta ætti að gerast í Memphis og New York og engar refjar. Þeir hótuðu öllu illu og alþjóðlegri málssókn svo  bandið lúffaði, fór í stúdíó og skaut inn þessum tveim orðum, eins og glöggt má heyra ef grannt er hlustað.